Katawang Agêng
Sêsindhèn Badhaya gêndhing Katawang Agêng, laras pelog gangsal
raka pakênira sampun atêngara | sira puniki kari | angling Jayèngsêkar | lah bapa têngaraa | tumulya têngara nitir | sumrêg atata | saparannya ngajabsih ||
alancingan pêthak alus kampuh jingga | sabuk pathol wilis | akris cinitrèng mas | sêngkang maniking toya | binapang ing mas angrawit | sêkar cêpaka | gêgônda amrik minging ||
akêkace cindhe binggêl mas rinêngga | ya urap-urap sari | jamang mas tinatrap | ing rêtna adikara | asumping swarna lan rumbing | sumarsana bra | sumêr gandanya amrik ||
Mêndhak nêmbah, nuntên mungêl malih gêndhing.
sêmang-sêmang | dhuh | asarea lêt gêguling | dewa dharat apit-apiting gapura | kadrawasan gêguling aglar ing jogan | ning wong agung susuhunan ||
sapa baya | kang awêlas saking brangti | dhuh | pandaming rat kusuma dinanurwenda | kawastara nanging sira ing paprêman | ning wong agung susuhunan ||
danumadya | dhuh | ambara lali sih jiwa | dèn asamar awèta anuwun pada | ning wong agung susuhunan ||
lêlewane | yèn prapti gêtêri ati | dhuh | myanggalit | rondhone sira tilarsa | dèn aririh sarira sapa darbea | ning wong agung susuhunan ||
poma-poma | dhuh | yèn babar aja nglingsiri | tuduhêna gèn manira angawula | sun anuwun pada baya | susuhunan | sumbalinga yèn katona dadi lara | dadi edan baya | susuhunan ||
kapan baya | wong agung babo | sun apanggih ing paprêman | ning wong agung susuhunan | bale atma | tunjung alit sinaroja | dhe | ya dhuh lamun kangên tumutur pundi parannya | dhe ||
saturune | wong agung babo | ing paprêman | pra madya tangis | ni mbok dhangur | susuhunan | sinawisa | saraga têmah wiyoga | bok langak têmah wiyoga | dhe | ya dhuh | tanna panggih yèn baya sarana jiwa ||
Suwuk lajêng mungêl malih katawang
bêbaguse wayuha sanambang | dhe | sindura pinipis pindho | susuhunan ||
dhe | anglawat akèh rabine | susuhunan ||
dhe | anglawat kathah garwane | susuhunan ||
dhe | sêsotya aglaring mega | susuhunan ||
dhe kadi lintang kuwasane |susuhunan. nga.
anênangis | tumêngèng ing tawang .nga. ||
dhe | kadya lintang pakartine panêmbahan ||
tanuastra | kadi ta agêni ||
dhe | urube kantar-kantar | kiyai ||
dhe | yèn mati ngêndi surupe | kiyai | yèn mati pundi surupe | kiyai ||
Gêndhing katawang Agêng punika miturut buku pasindhèn badhaya saking musium, anggitan dalêm Ingkang Sinuhun Kangjêng Sultan Agung.
Video :
1. http://www.youtube.com/watch?v=-s21OGopAQc
2.http://www.youtube.com/watch?v=zlpoG5urKa4
3. http://www.youtube.com/watch?v=bWPFmW148dI (Backsound Bedhaya ketawang dari “tumêngèng ing tawang .nga. dhe”)
